திருநெல்வேலி: தமிழ்நாட்டில் கடந்த 24 மணி நேரத்தில் நான்கு படுகொலைச் சம்பவங்கள் நடந்து பரபரப்பை ஏற்படுத்தியுள்ளன. சென்னை, மதுரை, ஈரோடு, மற்றும் நெல்லை ஆகிய இடங்களில் இந்தக் கொலைகள் நிகழ்ந்துள்ளன.
இதில், நெல்லை மாநகர் கே.டி.சி. நகர் அஷ்டலட்சுமி தெருவில் நடந்த ஆணவக் கொலைச் சம்பவம் குறிப்பிடத்தக்கது.தூத்துக்குடி மாவட்டம், ஆறுமுகமங்கலத்தைச் சேர்ந்த கவின் செல்வகணேஷ் (வயது 26), சென்னையில் உள்ள பிரபல ஐ.டி. நிறுவனத்தில் மென்பொறியாளராகப் பணியாற்றி வந்தவர்.
பட்டியலின சமூகத்தைச் சேர்ந்த இவர், தனது தாத்தாவின் உடல்நலக் குறைவு காரணமாக பாளையங்கோட்டை கே.டி.சி. நகர் பகுதியில் உள்ள சித்த மருத்துவமனைக்கு அழைத்து வந்திருந்தார்.
மருத்துவமனை வாசலில் காத்திருந்தபோது, சுர்ஜித் (வயது 24) என்பவர் கவினை அரிவாளால் சரமாரியாக வெட்டிக் கொலை செய்துவிட்டு, பின்னர் பாளையங்கோட்டை காவல் நிலையத்தில் சரணடைந்தார்.
இந்தக் கொலை காதல் விவகாரத்தால் நடந்த ஆணவக் கொலை எனக் கருதப்படுகிறது. கவின் மற்றும் சுர்ஜித்தின் சகோதரியான சுபாஷினி ஆகியோர் பள்ளி காலத்தில் இருந்து நண்பர்களாக இருந்து, பின்னர் காதலித்து வந்ததாகக் கூறப்படுகிறது.
இது சுர்ஜித்தின் பெற்றோரான சரவணக்குமார் மற்றும் கிருஷ்ணவேணி ஆகியோருக்கு பிடிக்கவில்லை. இவர்கள் இருவரும் காவல் துறையில் உதவி ஆய்வாளர்களாக (எஸ்.ஐ.) பணியாற்றி வருகின்றனர். கவினின் பெற்றோர் அளித்த புகாரின்படி, சுர்ஜித்தின் பெற்றோரின் தூண்டுதலால் இந்தக் கொலை நடந்ததாகக் குற்றம்சாட்டப்பட்டுள்ளது.
இதையடுத்து, பாளையங்கோட்டை காவல் நிலையத்தில் சுர்ஜித் மீது கொலை, வன்கொடுமை உள்ளிட்ட நான்கு பிரிவுகளின் கீழ் வழக்குப் பதிவு செய்யப்பட்டுள்ளது.
மேலும், சுர்ஜித்தின் பெற்றோர் மீதும் கொலை மற்றும் வன்கொடுமை தடுப்புச் சட்டப் பிரிவுகளின் கீழ் வழக்குப் பதிவு செய்யப்பட்டுள்ளது. கவினின் உறவினர்கள், சுர்ஜித்தின் பெற்றோரை 24 மணி நேரத்திற்குள் கைது செய்ய வேண்டும், அவர்களைப் பணிநீக்கம் செய்ய வேண்டும் எனக் கோரி முக்காணி பகுதியில் சாலை மறியல் போராட்டத்தில் ஈடுபட்டனர்.
இதனைத் தொடர்ந்து, காவல் துறை அதிகாரிகள், சுர்ஜித்தின் பெற்றோரை 24 மணி நேரத்தில் கைது செய்வதாக உறுதியளித்ததை அடுத்து, மூன்று மணி நேரமாக நடந்த போராட்டம் வாபஸ் பெறப்பட்டது.கவினின் உடல் திருநெல்வேலி மருத்துவக் கல்லூரி மருத்துவமனையில் பிரேதப் பரிசோதனைக்காக அனுப்பப்பட்டுள்ளது.
சுர்ஜித்தின் பெற்றோர் கைது செய்யப்பட்ட பின்னரே கவினின் உடலைப் பெற்றுக்கொள்வோம் என அவரது உறவினர்கள் தெரிவித்துள்ளனர். இந்தச் சம்பவம் திருநெல்வேலியில் பெரும் பரபரப்பையும், சமூகப் பதற்றத்தையும் ஏற்படுத்தியுள்ளது.
விடுதலைச் சிறுத்தைகள் கட்சித் தலைவர் தொல். திருமாவளவன், இந்த ஆணவக் கொலைக்கு கடும் கண்டனம் தெரிவித்து, சுர்ஜித்தின் பெற்றோரை உடனடியாக கைது செய்ய வேண்டும் எனவும், ஆணவக் கொலைகளைத் தடுக்க சிறப்பு சட்டம் இயற்ற வேண்டும் எனவும் வலியுறுத்தியுள்ளார்.
மேலும், கவினின் குடும்பத்திற்கு உரிய இழப்பீடு மற்றும் அரசு வேலை வழங்க வேண்டும் எனவும் கோரிக்கை விடுத்துள்ளார்.இந்தக் கொலைச் சம்பவம், தமிழ்நாட்டில் சட்டம் ஒழுங்கு குறித்த கேள்விகளை எழுப்பியுள்ளது.
Summary : In Tamil Nadu, four murders occurred within 24 hours across Nellai, Madurai, Chennai, and Erode. In Nellai, Kavin, a Scheduled Caste IT employee, was killed in an honor killing by Surjith. Surjith’s parents, police sub-inspectors, are accused of instigating the crime, sparking protests.
