4 கோடி ரூபாய் கடன்.. கணவருடன் நடுத்தெருவில் நின்ற நீலிமா ராணி..!

சின்னத்திரை மற்றும் வெள்ளித்திரையில் தனக்கென ஒரு முத்திரை பதித்தவர் நடிகை நீலிமா ராணி. தாமரை, செல்லமே, வாணி ராணி, கோலங்கள், மெட்டி ஒலி போன்ற பல பிரபலமான சீரியல்களில் தனது சிறப்பான நடிப்பை வெளிப்படுத்தியுள்ளார். 

அதுமட்டுமின்றி, நான் மகான் அல்ல, பண்ணையாரும் பத்மினியும் போன்ற திரைப்படங்களிலும் முக்கிய கதாபாத்திரங்களில் நடித்துள்ளார். இந்நிலையில், நடிகை நீலிமா ராணி தனது வாழ்க்கையில் சந்தித்த கடுமையான சவால்கள் குறித்து மனம் திறந்து பேசியுள்ளார்.

4 கோடி ரூபாய் நஷ்டம்

நீலிமா ராணி தனது பேட்டியில், "நானும் என் கணவரும் இணைந்து சுமார் 4 கோடி ரூபாய் பட்ஜெட்டில் ஒரு திரைப்படம் தயாரிக்க முடிவு செய்தோம். 

இதற்காக வெளியில் அதிக வட்டிக்கு கடன் வாங்கி படத்தை தயாரித்தோம். ஆனால், எதிர்பாராத விதமாக அந்த படம் சரியாக போகவில்லை. 

இறுதியில் அந்த படத்தை வெளியிட முடியாமல் குப்பையில் போட வேண்டிய நிலை ஏற்பட்டது. அந்த படத்திற்காக வாங்கிய கடனால் நாங்கள் நடுத்தெருவில் நின்றோம்" என்று வேதனையுடன் கூறினார்.

நண்பர் வீட்டில் தஞ்சம்

தொடர்ந்து பேசிய அவர், "எல்லாம் இழந்த பிறகு, இனி இங்கிருந்து எப்படி முன்னேறுவது என்று நானும் என் கணவரும் யோசித்தோம். 

அந்த சமயத்தில் தான் நான் மீண்டும் சின்னத்திரையில் நடிக்க ஆரம்பித்தேன். வாணி ராணி, தாமரை, தலையணை பூக்கள் போன்ற சீரியல்களில் நடித்தேன். 

வாடகை வீட்டிற்கு கூட போக முடியாத சூழ்நிலையில், என் கணவரின் நண்பர் வீட்டில் ஒரு அறையில் தங்கியிருந்தோம்" என்று அந்த கஷ்டமான நாட்களை நினைவு கூர்ந்தார்.

தோல்வியை வென்ற மீள் எழுச்சி

"எங்களுடைய இலக்கு வெற்றி பெற வேண்டும் என்று இருந்தால், தோல்விகளையும் ஏற்றுக்கொள்ள தயாராக இருக்க வேண்டும். அந்த மனோபாவம் தான் எங்களை மீண்டும் அந்த இடத்தில் நிலை நிறுத்த உதவியது. 

2017ல் ஜீ தமிழ் தொலைக்காட்சியில் என்றென்றும் புன்னகை, நிறைமாறாத பூக்கள் ஆகிய சீரியல்களை தயாரித்தோம். சினிமா தயாரிப்பதே எங்கள் முக்கிய குறிக்கோளாக இருந்தாலும், முதலில் சீரியல்களை தயாரித்தோம். 

கண்டிப்பாக ஒரு நாள் படம் தயாரிப்போம். நாம் சோர்ந்து போய் உட்கார்ந்தால் யாரும் நமக்கு உதவ வரப்போவதில்லை. நமக்கு நாமே தான் உதவிக்கொள்ள வேண்டும்" என்று நீலிமா ராணி நம்பிக்கையுடன் தெரிவித்தார்.

நீலிமா ராணியின் இந்த வெளிப்படையான பேச்சு பலருக்கும் ஊக்கமளிக்கும் விதமாக அமைந்துள்ளது. கடுமையான தோல்விகளையும் தாண்டி மீண்டும் வெற்றி பெற முடியும் என்பதை அவரது வாழ்க்கை நமக்கு உணர்த்துகிறது.