ஆசை ஆசையாய் கட்டிய வீடு! திடீரென எழுந்த துர்நாற்றம்! நூறாவது நாள் படம் போல கொடூரம்..!

கள்ளக்குறிச்சி : பீகார் மாநிலத்தைச் சேர்ந்த இளைஞர் ஒருவர் அடித்துக் கொலை செய்யப்பட்டு, கட்டுமானப் பணி நடைபெறும் வீட்டில் புதைக்கப்பட்ட சம்பவம் கள்ளக்குறிச்சி மாவட்டத்தில் அதிர்ச்சியை ஏற்படுத்தியுள்ளது. போலீசார் சம்பவம் தொடர்பாக விசாரணை நடத்தி வருகின்றனர்.

பீகார் மாநிலம், கமல் பகுதியைச் சேர்ந்தவர் பவன்குமார் (வயது விவரம் தெரியவில்லை). இவர் தனது நண்பர்களுடன் சேர்ந்து, கள்ளக்குறிச்சி மாவட்டம், உளுந்தூர்பேட்டை அருகே உள்ள மாம்பாக்கம் கிராமத்தில் ரமேஷ் என்பவருக்கு சொந்தமான புதிய அடுக்குமாடி வீட்டில் டைல்ஸ் பொருத்தும் பணிக்காக வந்திருந்தார்.

கடந்த நவம்பர் 6-ம் தேதி, பவன்குமாருடன் வந்த ஒரு இளைஞர் சொந்த ஊருக்குப் புறப்பட்டுச் சென்றுவிட்டார். மற்றொரு இளைஞர் மாயமானார். இந்நிலையில், பவன்குமாரின் உறவினர் சோனா சைனி, அவரை செல்போனில் தொடர்பு கொள்ள முயன்றார். ஆனால், பவன்குமாரின் செல்போன் ஸ்விட்ச் ஆஃப் செய்யப்பட்டிருந்தது.

தொடர்ந்து தொடர்பு கொள்ள முடியாததால், சோனா சைனி நேரடியாக மாம்பாக்கம் கிராமத்துக்கு வந்து தேடினார். தேடுதலின்போது, பவன்குமார் கிடைக்கவில்லை. அதேசமயம், கட்டுமான வீட்டிலிருந்து துர்வாசனை வீசியது. இதனால் சந்தேகமடைந்த சோனா சைனி, உடனடியாக கிராம மக்களுடன் சேர்ந்து உளுந்தூர்பேட்டை காவல் நிலையத்துக்கு தகவல் தெரிவித்தார்.

சம்பவ இடத்துக்கு விரைந்த போலீசார், துர்வாசனை காரணமாக யாரேனும் கொலை செய்யப்பட்டு புதைக்கப்பட்டிருக்கலாம் என சந்தேகித்தனர். அதிகாரிகள் முன்னிலையில், துர்வாசனை வந்த இடத்தைத் தோண்டிப் பார்த்தபோது, பவன்குமாரின் சடலம் கிடைத்தது.

சடலத்தை கைப்பற்றிய போலீசார், பிரேத பரிசோதனைக்காக கள்ளக்குறிச்சி அரசு மருத்துவமனைக்கு அனுப்பி வைத்தனர். பிரேத பரிசோதனையில், பவன்குமார் தலையில் அடித்தும், கழுத்தை அறுத்தும் கொலை செய்யப்பட்டு புதைக்கப்பட்டிருந்தது தெரியவந்தது.

இச்சம்பவத்தில் தொடர்புடையதாகக் கருதப்படும், பவன்குமாருடன் சேர்ந்து வேலைக்கு வந்த வட மாநில இளைஞர்களை போலீசார் தீவிரமாகத் தேடி வருகின்றனர். இந்தக் கொலைக்கான காரணம் குறித்து விசாரணை நடைபெற்று வருகிறது. மேலும் விவரங்கள் வெளியாகும் என எதிர்பார்க்கப்படுகிறது.

Summary in English : A Bihar youth, Bhavankumar from Kamal area, was murdered and buried at a construction site in Mambakkam village near Ulundurpettai, Kallakurichi district, while tiling a new apartment with friends. Relative Sona Saini noticed foul smell after phone was off, alerted locals and police. Body recovered with head injuries and slit throat; authorities search for co-workers.