காட்டுக்குள் இறந்து கிடந்த பெண்.. விசாரணையில் வெளியான கொடூரர்களின் பின்னணி..

பர்கூர் (கிருஷ்ணகிரி மாவட்டம்), டிச. 1: சொத்து தகராறு காரணமாக 56 வயதுப் பெண்ணை கொடூரமாகக் கொலை செய்த வழக்கில் மூன்று பேரை பர்கூர் போலீசார் ஞாயிற்றுக்கிழமை கைது செய்தனர்.

கிருஷ்ணகிரி மாவட்டம், பர்கூர் அடுத்த ஐகுந்தம் கொத்தப்பள்ளி ஊராட்சிக்குட்பட்ட மேல்சீனிவாசபுரத்தைச் சேர்ந்தவர் முருகன் மனைவி கோவிந்தம்மாள் (வயது 56). 

கூலித் தொழிலாளியான இவர் கடந்த 25-ம் தேதி ஊரக வேலைத்திட்டப் பணிக்காக பெரியமலை அடிவாரத்தில் உள்ள பண்ணைக் குட்டை அமைக்கும் இடத்திற்குச் சென்றிருந்தார்.

மாலையில் அவர் வீடு திரும்பவில்லை. மறுநாள் காலை மலை அடிவாரத்தில் அவரது உடல் ரத்த வெறிய உடையில் மர்மமான முறையில் கிடந்தது. தகவல் அறிந்து சம்பவ இடத்திற்கு விரைந்த பர்கூர் போலீசார் உடலை மீட்டு பிரேதப் பரிசோதனைக்கு அனுப்பி வைத்தனர்.

உடற்கூறு அறிக்கையில் கோவிந்தம்மாள் கட்டையால் தாக்கப்பட்டும் கழுத்து நெரிக்கப்பட்டும் கொலை செய்யப்பட்டது உறுதியானது. மாவட்டக் காவல் கண்காணிப்பாளர் தங்கதுரை உத்தரவின்படி, துணை கண்காணிப்பாளர் முத்துகிருஷ்ணன் மேற்பார்வையில் ஆய்வாளர்கள் இளவரசன் (பர்கூர்), அன்பழகன் (நாகரசம்பட்டி) தலைமையிலான தனிப்படை அமைக்கப்பட்டு தீவிர விசாரணை நடத்தப்பட்டது.

விசாரணையில் திடுக்கிடும் தகவல்கள் வெளியாகின:

• கோவிந்தம்மாளின் கணவர் முருகன் 7 ஆண்டுகளுக்கு முன்பு தனது 57 செண்டு நிலத்தை சுப்பிரமணி என்பவருக்கு ஒப்பந்தம் செய்து பணம் பெற்றிருந்தார்.
• பின்னர் அந்த நிலத்தை முருகனின் அண்ணன் பச்சியப்பன் மகன் சக்திவேல் (44) வாங்கியிருந்தார்.
• “எங்கள் நிலத்தை பறித்துக் கொண்டீர்கள்” எனக் கூறி கோவிந்தம்மாள் சக்திவேலிடம் அடிக்கடி தகராறு செய்து வந்தார்.
• சமீபத்தில் சக்திவேல் அந்த நிலத்தில் புதிய வீடு கட்டி குடியேறியபோது, அங்கு வந்த கோவிந்தம்மாள் சக்திவேலை தவிர, அவருக்கு ஆதரவாகப் பேசிய உறவினர்களான வெங்கட்ராமன் (65), கோவிந்தராஜ் (64) ஆகியோரையும் தகாத வார்த்தைகளால் திட்டியுள்ளார்.

இதனால் கொதிப்படைந்த சக்திவேல், வெங்கட்ராமன், கோவிந்தராஜ் ஆகிய மூவரும் சேர்ந்து கோவிந்தம்மாளைக் கொலை செய்யத் திட்டமிட்டனர். வேலை முடிந்து திரும்பிய அவரை வழிமறித்து கட்டையால் அடித்து, கழுத்தை நெரித்துக் கொலை செய்தனர்.

பின்னர் கொலைக்குக் காரணம் நகைக்கொள்ளை எனத் தோற்றமளிக்க அவரது கைப்பேசி, கால் கொலுசு, தோடு ஆகியவற்றைப் பறித்து அருகிலுள்ள குட்டையில் வீசிவிட்டு சென்றது போலீசார் விசாரணையில் தெரியவந்தது.

இதையடுத்து சக்திவேல் (44), வெங்கட்ராமன் (65), கோவிந்தராஜ் (64) ஆகிய மூவரையும் போலீசார் ஞாயிற்றுக்கிழமை கைது செய்தனர். மூவரும் பர்கூர் நீதிமன்றத்தில் ஆஜர்படுத்தப்பட்டு சிறையில் அடைக்கப்பட்டனர்.

சொத்து தகராறு எல்லை மீறி கொலை வரை சென்ற சம்பவம் அப்பகுதியில் பெரும் பரபரப்பை ஏற்படுத்தியுள்ளது.

Summary : Near Bargur, a 56-year-old woman, Govindammal, was murdered over a land dispute. Three relatives—Sakthivel (44), Venkataraman (65), and Govindarajan (64)—beat her with a stick, strangled her, and staged a robbery by throwing her phone and jewellery into a pond. Police arrested all three on Sunday.