இந்த கொடூர சம்பவத்திற்கு அடிப்படை காரணம் என்ன..? படித்து உங்கள் பதிலை சொல்லுங்க மக்களே..!

மதுரை : மதுரை மாவட்டத்தின் மீனாட்சிபுரம் பகுதியில் நடந்த கொடூர சம்பவம் ஒன்று அப்பகுதி மக்களிடையே பெரும் அதிர்ச்சியையும் பரபரப்பையும் ஏற்படுத்தியுள்ளது. 42 வயதுடைய பாண்டித்துரை என்பவர், தனது கொள்ளைக்கு பழிவாங்கும் வகையில் இரண்டு இளைஞர்களால் அரிவாளால் சரமாரியாக வெட்டப்பட்டு படுகொலை செய்யப்பட்டார்.

இந்த கொடூர கொலைக்கு பின்னால் பழிவாங்கல் உணர்ச்சியும், பழைய பகையும் இருப்பது போலீசார் விசாரணையில் தெரியவந்துள்ளது. கடந்த சில நாட்களுக்கு முன்பு, செல்லூர் போஸ் வீதியைச் சேர்ந்த மணிரத்தினம் என்பவரின் தந்தையிடம் இருந்து செல்போன் மற்றும் பணத்தை வழிப்பறி செய்த பாண்டித்துரை, "இதை வெளியே சொன்னால் கொன்றுவிடுவேன்" என கொடூரமாக மிரட்டியிருந்தார்.

இது குறித்து புகார் அளிக்கப்பட்டதையடுத்து, பாண்டித்துரை கைது செய்யப்பட்டு சிறையில் அடைக்கப்பட்டார். ஆனால், 15 நாட்களுக்கு முன்பு ஜாமீனில் வெளியே வந்த அவர், தனது பழைய வாழ்க்கையை சுதந்திரமாக தொடர்ந்தார்.

தன் தந்தையை தாக்கி, மிரட்டிவிட்டு இப்போது பெயிலில் வெளியே வந்து சுதந்திரமாக இருக்கிறாயா..? என்று இதனால் ஆத்திரமடைந்த மணிரத்தினம், தனது நண்பர் ராஜகுருவுடன் இணைந்து பாண்டித்துரையை கொலை செய்ய கொடூர திட்டம் தீட்டினார்.

நேற்று மாலை, மீனாட்சிபுரம் பிரதான சாலையில் அமைந்துள்ள நாடக மேடையில் அமர்ந்திருந்த பாண்டித்துரையை கண்ட இருவரும், திடீரென அங்கு சென்று தகராறு செய்தனர். அடுத்த நொடியில், மறைத்து வைத்திருந்த அரிவாளை எடுத்து, பாண்டித்துரையின் தலை, முகம், நெஞ்சு ஆகிய பகுதிகளில் சரமாரியாக வெட்டினர். ரத்தம் சொட்ட சொட்ட கீழே விழுந்த பாண்டித்துரை, அந்த இடத்திலேயே உயிருக்கு போராடினார்.

அப்பகுதி மக்கள் அலறியடித்து ஓடிய நிலையில், சம்பவம் குறித்து போலீசாருக்கு தகவல் தெரிவிக்கப்பட்டது. சம்பவ இடத்திற்கு விரைந்து வந்த செல்லூர் காவல்துறையினர், ரத்த வெள்ளத்தில் கிடந்த பாண்டித்துரையை மீட்டு ஆட்டோவில் ஏற்றி மதுரை அரசு ராஜாஜி மருத்துவமனைக்கு அழைத்துச் சென்றனர். ஆனால், அங்கு பரிசோதித்த மருத்துவர்கள், அவர் ஏற்கனவே உயிரிழந்துவிட்டதாக அதிர்ச்சி தகவலை தெரிவித்தனர்.

பாண்டித்துரை மீது ஏற்கனவே கொலை, கொள்ளை உள்ளிட்ட பல்வேறு வழக்குகள் மதுரை மற்றும் சுற்றுவட்டார காவல் நிலையங்களில் நிலுவையில் இருந்தது குறிப்பிடத்தக்கது. இதையடுத்து, வழக்கு பதிவு செய்த போலீசார் தீவிர விசாரணை நடத்தினர்.

கொலை செய்துவிட்டு தப்பியோட முயன்ற மணிரத்தினம் (செல்லூர் போஸ் வீதி) மற்றும் ராஜகுரு (பூந்தமல்லி நகர்) ஆகியோரை கைது செய்து நீதிமன்றத்தில் ஆஜர்படுத்தி சிறையில் அடைத்தனர். "இது வெறும் பழிவாங்கல் கொலை அல்ல, பகைமை உணர்ச்சியால் தூண்டப்பட்ட கொடூரம்" என போலீசார் தெரிவித்துள்ளனர்.

இந்த சம்பவம் மதுரை மக்களிடையே பெரும் பீதியை ஏற்படுத்தியுள்ளது. "அரிவாள் வன்முறை எப்போது தான் ஒழியும்?" என அப்பகுதி மக்கள் கேள்வி எழுப்பியுள்ளனர். போலீசார் மேலும் விசாரணை நடத்தி வருகின்றனர்.

மக்களே.. நீங்க சொல்லுங்க.. இந்த சம்பவத்திற்கு அடிப்படை காரணம் என்ன..? தன்னுடைய தந்தையை தாக்கி விட்டான் என்று பாண்டித்துரை மீது வழக்கு பதிவு செய்தார் மணிரத்தினம். ஆனால், 15 நாள் ரிமாண்ட் செய்து விட்டு ஜாமீனில் வெளியே அனுப்பியுள்ளது சட்டம். மணிரத்தினம் மனம் ஏற்கும் வகையில் பாண்டித்துரைக்கு சரியான தண்டனை தகுந்த நேரத்தில் கொடுத்திருந்தால் மணிரத்தினம் தற்போது கொலைகாரன் என்ற பட்டத்தை சுமக்க வேண்டிய சூழல் வந்திருக்குமா..?

அல்லது,

மணிரத்தினம் செய்தது தான் தவறு என்று நினைகிறீர்கள் என்றால்.. அதற்கு என்ன காரணம் என்று கமெண்ட் செக்ஷனில் பதிவு செய்யுங்கள்.

Summary in English : In Madurai, 42-year-old Pandithurai, a criminal with prior murder and robbery cases, robbed Manirathinam's father and threatened him. After being arrested and released on bail, Manirathinam and friend Rajaguru avenged the act by hacking Pandithurai to death with a sickle at a public stage. Police arrested the duo after the brutal murder shocked locals.