நேற்று டெல்லியில் உள்துறை அமைச்சர் அமித் ஷாவை சந்தித்த அதிமுக பொதுச்செயலாளரும் எதிர்க்கட்சித் தலைவருமான எடப்பாடி கே. பழனிசாமி, சந்திப்பு குறித்து நடத்திய பத்திரிகையாளர் சந்திப்பில் வெளியிட்ட கருத்துகள் அரசியல் வட்டாரத்தில் பெரும் பரபரப்பை ஏற்படுத்தியுள்ளன.
அமித் ஷா சந்திப்பின் நோக்கம் குறித்து கேள்வி எழுப்பப்பட்டபோது, எடப்பாடி பழனிசாமி, "தமிழ்நாட்டின் அரசியல் சூழல் குறித்து பொதுவான கலந்துரையாடல் மட்டுமே நடைபெற்றது. வழக்கமாக கூட்டணி கட்சித் தலைவர்களுடன் நடக்கும் வகையிலான கலந்துரையாடல் தான்" என்று தெரிவித்தார்.
தொடர்ந்து, தமிழக வெற்றி கழகம் (டிவிகே) கட்சியுடன் அதிமுக கூட்டணி அமைக்க இருப்பதாகவும், பின்னர் கடைசி நேரத்தில் கூட்டணி இல்லை என்று கூறிவிட்டதாகவும் ஊடகங்களில் வெளியான தகவல்கள் குறித்து கேள்வி எழுப்பப்பட்டது.
இதற்கு எடப்பாடி பழனிசாமி அளித்த பதில் அதிர்வலைகளை ஏற்படுத்தியது. அவர் கூறியதாவது:
"டிவிகேவுடன் கூட்டணி பேச்சுவார்த்தை நடத்துகிறோம் என்று அதிமுக தரப்பிலிருந்தோ, எங்கள் கூட்டணி கட்சி தலைவர்கள் தரப்பிலிருந்தோ ஏதேனும் கூறினோமா? அல்லது டிவிகே கட்சியை சேர்ந்தவர்கள் கூறினார்களா? எதுவுமே இல்லை. ஊடகங்கள் தான் இந்த யூகங்களை கிளப்பிவிட்டன.
டிவிகே கட்சி கூட்டணிக்கு வந்து தான் அதிமுக வெல்ல வேண்டும் என்ற சூழ்நிலையில் இல்லை. என்டிஏ கூட்டணி வலுவான கூட்டணி. மக்கள் எங்கள் பக்கம் இருக்கிறார்கள். தனிப் பெரும்பான்மையுடன் தமிழகத்தில் ஆட்சி அமைக்கும் அளவுக்கு என்டிஏ கூட்டணி வலுவாக உள்ளது.
கடந்த ஐந்து ஆண்டுகளில் திமுக அரசு புதிய திட்டங்கள் என்ன நிறைவேற்றியது? புதிய முதலீடுகள் என்ன கொண்டு வந்தது? என்று எதையும் பேசாமல், சதா சர்வகாலமும் மத்திய அரசை எதிர்த்துக்கொண்டு, மக்கள் நலப் பணியில் கவனம் செலுத்தாமல், தங்கள் குடும்ப உறுப்பினர்கள் கொள்ளையடிப்பதற்கான ஆட்சியைத் தான் ஐந்தாண்டுகளாக திமுக கொடுத்து வருகிறது.
சட்டம் ஒழுங்கு பற்றி திமுக அரசுக்கு கவலை இருப்பதாகத் தெரியவில்லை. மக்கள் அச்சத்தில் உள்ளனர். இந்த விடியா திமுக அரசை வீட்டுக்கு அனுப்புவதில் மக்கள் ஆர்வமுடன் உள்ளனர். இதற்கு சிறந்த மாற்று அதிமுக தான் என்று மக்கள் நம்புகின்றனர்.
234 தொகுதிகளிலும் வெற்றி பெறும் நோக்கத்தில் இந்திய தேசிய ஜனநாயகக் கூட்டணி (என்டிஏ) புயல் வேகத்தில் வேலை செய்து வருகிறது. மக்களின் பேராதரவுடன் அதிமுக வெற்றி பெற்று ஆட்சி அமைக்கும்" என்று தெரிவித்தார்.
இந்த கருத்துகள் திமுக அரசுக்கு எதிரான கடுமையான விமர்சனமாகவும், என்டிஏ கூட்டணியின் வலிமையை வலியுறுத்துவதாகவும் அமைந்துள்ளன.
டிவிகே உள்ளிட்ட புதிய கட்சிகளுடனான கூட்டணி வாய்ப்புகளை மறுத்து, தனிப் பெரும்பான்மை பலத்துடன் வெற்றி பெறுவோம் என்ற அதிமுக தலைமையின் நிலைப்பாடு தெளிவாக வெளிப்பட்டுள்ளது. இது 2026 சட்டமன்றத் தேர்தலுக்கு முன்னதாக அரசியல் வெப்பத்தை மேலும் அதிகரித்துள்ளது.
Summary : EPS met Amit Shah and discussed Tamil Nadu's political situation in a routine meeting. He dismissed rumors of alliance talks with TVK, stating NDA is strong and confident of winning a majority in Tamil Nadu. He criticized DMK for focusing on family interests over public welfare and law & order, asserting people prefer AIADMK as the better alternative.
