கிருஷ்ணகிரி : ஓசூர் அருகே கெலமங்கலம் பகுதியில் புதையல் எடுக்கும் நம்பிக்கையில் நடைபெற்ற சடங்கில் ஒரு விவசாயி கொலை செய்யப்பட்ட சம்பவம் பெரும் பரபரப்பை ஏற்படுத்தியுள்ளது. இந்தக் கொலை நரபலி சடங்குடன் தொடர்புடையதாக போலீசார் சந்தேகிக்கின்றனர்.
புதூர் கிராமத்தைச் சேர்ந்த லட்சுமணன் (52) என்பவர் விவசாயத் தொழில் செய்து வந்தார். அவரது வெற்றிலைத் தோட்டத்தில் புதையல் இருப்பதாக நம்பிய அவர், தர்மபுரியைச் சேர்ந்த மணி (65) என்பவருடன் இணைந்து புதையல் எடுக்க திட்டமிட்டார். மணி ஒரு பாதுகாவலராக பணியாற்றி வந்தவர்.
சாமியார் ஒருவர் மூலம் புதையல் கிடைக்க நரபலி கொடுக்க வேண்டும் என லட்சுமணனுக்கு அறிவுறுத்தப்பட்டது. அதன்படி, மணியிடம் சிகிச்சைக்கு வரும் ஒரு பெண்ணை தோட்டத்துக்கு அழைத்து அவரை பலியிட இருவரும் திட்டமிட்டனர்.
செப்டம்பர் 28-ம் தேதி தோட்டத்தில் சுமார் 1.5 அடி ஆழ குழி தோண்டி, வெற்றிலை, பாக்கு, எலுமிச்சை, மஞ்சள், குங்குமம், கற்பூரம் உள்ளிட்ட பூஜைப் பொருட்களை வைத்தனர். ஒரு கோழியையும் அறுத்து சடங்கு நடத்தினர்.
ஆனால், திட்டமிட்ட பெண் வராததால் இருவருக்கும் இடையே தகராறு ஏற்பட்டது. லட்சுமணன் மணியை தாக்க முயன்றதாகக் கூறப்படுகிறது. இதனால் ஆத்திரமடைந்த மணி, லட்சுமணனை மரத்தடியால் தலையில் அடித்து கொலை செய்தார். பின்னர் பூஜையை முடித்து புதையலை தேடினார். எதுவும் கிடைக்காததால் உடலை அங்கேயே விட்டுவிட்டு தப்பிச் சென்றார்.
சம்பவ இடத்தில் உடல் கண்டுபிடிக்கப்பட்டதைத் தொடர்ந்து கெலமங்கலம் போலீசார் வழக்குப் பதிவு செய்து விசாரணை நடத்தினர். பூஜைப் பொருட்கள் மற்றும் அறுக்கப்பட்ட கோழி இருந்ததால் நரபலி சடங்கு என சந்தேகம் எழுந்தது. விசாரணையில் மணி கைது செய்யப்பட்டு, முழு உண்மையை ஒப்புக்கொண்டார்.
புதையல் ஆசை காரணமாக ஏற்பட்ட மூட நம்பிக்கை இந்தக் கொடூர சம்பவத்துக்கு வழிவகுத்துள்ளது. இந்த வழக்கில் மேலும் விசாரணை நடைபெற்று வருகிறது.
Summary in English : In Krishnagiri district near Kelamangalam, farmer Lakshmanan from Pudur village was involved in a treasure search ritual at his betel nut farm. A planned ceremony with a companion did not proceed as expected, leading to an unexpected incident where he was found in a pit with puja items and a chicken. Police investigated and took one person into custody.
