திருநெல்வேலி மாவட்டத்தில் ஐ.டி. ஊழியர் கவின் செல்வகணேஷ் (27) ஆணவக் கொலை செய்யப்பட்ட சம்பவம் தமிழகத்தை உலுக்கியுள்ளது. கவின், சுபாஷினி என்ற பெண்ணை காதலித்ததாகக் கூறப்படுகிறது. ஆனால், கவின் பட்டியல் இனத்தைச் (SC) சேர்ந்தவர் என்பதால், சுபாஷினியின் குடும்பத்தினர் (MBC) காதலுக்கு எதிர்ப்பு தெரிவித்தனர்.
இதனால், ஜூலை 27, 2025 அன்று சுபாஷினியின் சகோதரர் சுர்ஜித் (23) கவினை அரிவாளால் வெட்டிக் கொலை செய்தார். சுர்ஜித் கைது செய்யப்பட்டு, குண்டர் சட்டத்தில் தடுத்து வைக்கப்பட்டார்.
சுர்ஜித்தின் தந்தை சரவணன், தமிழ்நாடு சிறப்பு காவல்படையில் சப்-இன்ஸ்பெக்டராக இருந்தவர், தற்போது சஸ்பெண்ட் செய்யப்பட்டு கைது செய்யப்பட்டுள்ளார்.
சுபாஷினியின் தாய் கிருஷ்ணகுமாரியும் விசாரணையில் உள்ளார். இந்நிலையில், சுபாஷினி வெளியிட்ட வீடியோவில், “நானும் கவினும் உண்மையாக காதலித்தோம். ஆனால், திருமணத்திற்கு இன்னும் ஆறு மாதங்கள் காத்திருக்க வேண்டும் என கவின் கேட்டிருந்தார்.
மே 30 அன்று சுர்ஜித், கவினிடம் பேசியபோது, நான் காதலிக்கவில்லை என மறுத்தேன், ஏனெனில் கவின் நேரம் கேட்டிருந்தார். ஜூலை 27 அன்று கவின், தாத்தாவின் உடல்நலம் குறித்து ஆலோசிக்க கிளினிக்கிற்கு வந்தது எனக்கு தெரியாது. அவர் வருவதாக 28 ஆம் தேதி தான் சொல்லியிருந்தார்.
அன்று மதியம், மங்கம்மாள் சாலையில் சுர்ஜித் கவினை சந்தித்து, என் திருமணத்திற்கு பின் கவினின் தொழிலைப் பார்க்கலாம் என பேசியதாக அறிந்தேன். ஆனால், அவர்களுக்கு இடையே என்ன உரையாடல் நடந்தது என்பது தெரியவில்லை.
என் பெற்றோருக்கு இந்தக் கொலைக்கும் எந்தத் தொடர்பும் இல்லை. எங்கள் காதல் பற்றி தவறாக பேச வேண்டாம். என் பெற்றோரை தண்டிக்க நினைப்பது தவறு, அவர்களை விடுங்கள்,” என வேதனையுடன் கூறினார்.
இந்தச் சம்பவம் குறித்து இயக்குநர் பா. ரஞ்சித், இசையமைப்பாளர் ஜி.வி. பிரகாஷ் உள்ளிட்டோர் கடும் கண்டனம் தெரிவித்துள்ளனர். கவினின் குடும்பம், சரவணன் மற்றும் கிருஷ்ணகுமாரியின் கைது கோரி, உடலை ஏற்க மறுத்து, திருநெல்வேலி மற்றும் தூத்துக்குடியில் போராட்டம் நடத்தியது.
விசாரணை சி.பி.சி.ஐ.டி-க்கு மாற்றப்பட்டுள்ளது. இந்த ஆணவக் கொலை தமிழகத்தில் ஜாதி வன்முறை குறித்த விவாதங்களை மீண்டும் தூண்டியுள்ளது.
Summary in English : Kavin, an IT employee from Tirunelveli, was killed by Subashini’s brother Surjith due to caste-based opposition to their love. Subashini denied the relationship initially but later confirmed their love in a video, urging people not to blame her parents. Surjith and his father, a suspended SI, were arrested.
