வேலூர் மாவட்டம் மேல்பாடி அருகே உள்ள சிவபுரம் கிராமம். அங்கு வசித்து வந்த கஜேந்திரன், 34 வயது. நீண்ட நாட்களாகத் திருமணம் ஆகாத அவருக்கு அண்ணன் ஜெய்சங்கர் சென்னையில் கட்டுமானத் தொழில் செய்து கொண்டிருந்தார்.
தம்பிக்கு ஒரு நல்ல பெண் பார்த்து திருமணம் செய்து வைக்க வேண்டும் என்ற எண்ணத்தில் இருந்தார்.
அப்போது, ஜெய்சங்கரிடம் பெயிண்டர் மற்றும் கார் ஓட்டுநராக வேலை செய்து வந்த முனுசாமி என்பவர், “என் உறவுக்காரப் பெண் ஒருவர் இருக்கிறார். சிறுவயதிலிருந்தே நாங்களே வளர்த்தோம்.
திருமணத்துக்கு தேவையான நகை, பொருட்கள் எதுவும் எங்களிடம் இல்லை” என்று கூறினார். பெண்ணுக்கும் விருப்பம் இருந்தால் திருமணம் செய்யலாம் என்று ஜெய்சங்கர் சம்மதித்தார்.
ஜெய்சங்கர் தன் சொந்த செலவில் சுமார் நான்கு லட்சம் ரூபாய் வரை செலவழித்து, நகைகள், திருமணப் பட்டு, பொருட்கள் அனைத்தையும் ஏற்பாடு செய்தார்.
கடந்த மாதம் 7-ம் தேதி சோளிங்கர் முருகன் கோவிலில் உறவினர்கள் முன்னிலையில் கஜேந்திரனுக்கும் அபிநயா என்ற அந்தப் பெண்ணுக்கும் திருமணம் நடைபெற்றது. மணமகள் வீட்டார் சார்பில் முனுசாமியும் அவரது தாயார் ஜோதியும் மட்டுமே வந்திருந்தனர்.
திருமணத்துக்குப் பிறகு ஜெய்சங்கர் மணமக்களுக்கு குடும்பச் சடங்குகளையும் மகிழ்ச்சியுடன் ஏற்பாடு செய்தார். ஆனால் திருமண வாழ்க்கை வெறும் ஒரு நாள் மட்டுமே இனிமையாக இருந்தது. அடுத்த நாள் முதல் அபிநயா கணவர் கஜேந்திரனுடன் சரியாகப் பேசாமல், தன் மாமா முனுசாமியுடனேயே அதிக நேரம் பேசி வந்தாள்.
15 நாட்கள் இப்படியே பிரச்சினைகளுடன் கழிந்தன. ஒரு நள்ளிரவில் அபிநயா வீட்டை விட்டு வெளியேறினாள். கஜேந்திரன் குடும்பத்தினர் மேல்பாடி காவல் நிலையத்தில் அவள் காணாமல் போனதாகப் புகார் கொடுத்தனர்.
பின்னர் அபிநயா முனுசாமியுடன் காவல் நிலையத்தில் ஆஜராகி, “இனி கஜேந்திரனுடன் வாழப் போவதில்லை. என் மாமா முனுசாமியுடன்தான் வாழப் போகிறேன்” என்று தெரிவித்தாள்.
அப்போதுதான் உண்மை வெளியானது. அபிநயா உண்மையில் முனுசாமியின் மனைவியின் தங்கை என்றும், இருவருக்கும் நீண்ட காலமாகத் தொடர்பு இருந்ததாகவும் தெரிய வந்தது. முனுசாமியின் மனைவி இந்த விவகாரம் தெரிந்து அவரை விட்டுப் பிரிந்து சென்றதாகவும் கூறப்படுகிறது.
கஜேந்திரன் மற்றும் அவரது குடும்பத்தினர் ஏமாற்றப்பட்டதை உணர்ந்து வேலூர் மாவட்ட காவல் கண்காணிப்பாளர் அலுவலகத்தில் மக்கள் குறைதீர்க்கும் நாளில் புகார் அளித்துள்ளனர்.
முனுசாமி, அபிநயா, ஜோதி ஆகியோர் மீது மோசடி உள்ளிட்ட குற்றச்சாட்டுகளுடன் நடவடிக்கை எடுக்கவும், செலவழித்த நான்கு லட்சம் ரூபாய், நகைகள் மற்றும் பொருட்களை மீட்டுத் தரவும் கோரியுள்ளனர்.
கஜேந்திரன் உருக்கமாகக் கூறியதாவது: “என்னை ஏமாற்றிய அபிநயா, முனுசாமி மற்றும் ஜோதி மீது சட்டப்படி நடவடிக்கை எடுத்து, என் பணத்தை மீட்டுத் தர வேண்டும். ஆனால் அபிநயா மனம் திருந்தி மீண்டும் வந்தால், அவரை மனைவியாக ஏற்றுக்கொள்ள நான் தயாராக இருக்கிறேன்.”
இந்த சம்பவம் வேலூர் பகுதியில் பெரும் பரபரப்பை ஏற்படுத்தியுள்ளது.
English Summary : In Vellore, Gajendran, 34, married Abinaya after his brother spent ₹4 lakh on the wedding. Days later, she left with her uncle Munusamy, revealing a prior relationship. The family filed a complaint alleging fraud, seeking recovery of expenses and legal action. Gajendran said he would accept her back if she returns repentant.
