விருதுநகர், நவம்பர் 8: கல்யாண வீட்டில் திடீரென மாயமான சிவலிங்காபுரத்தைச் சேர்ந்த ரவிக்குமாரும் சுரேஷ்குமாரும், ஒரு வாரத்திற்குப் பிறகு வேப்பிலைபட்டியில் உள்ள பாழடைந்த உரைக்கிணற்றில் அழுகும் நிலையில் சடலமாக மீட்கப்பட்ட சம்பவம் பெரும் அதிர்ச்சியை ஏற்படுத்தியுள்ளது.
இதனை தொடர்ந்து, விவசாயத் தோட்ட உரிமையாளர்கள் மணிகண்டன், சுதாகர் ஆகியோர் சடலங்களை மறைக்க முயன்றதும் வெளிப்பட்டதால், அவர்கள் காவல்துறையால் கைது செய்யப்பட்டுள்ளனர். என்ன நடந்தது..? வாங்க பாக்கலாம்.
கடந்த அக்டோபர் 31 அன்று, விருதுநகர் மாவட்டம் ஆலங்குளம் அருகேயுள்ள தொம்பைக்குளத்தைச் சேர்ந்த விக்னேஷ் மற்றும் ராஜபாளையத்தைச் சேர்ந்த முத்துப்பிரியாவிற்கு இடையேயான திருமணம், வேப்பிலைபட்டியில் உள்ள கெங்கையம்மன் கோயிலில் நடைபெற்றது.
திருமணத்திற்கு முந்தைய நள்ளிரவு, விக்னேஷின் உறவினர்களான சிவலிங்காபுரத்தைச் சேர்ந்த ரவிக்குமாரும் (35), சுரேஷ்குமார் (32) ஆகியோர் குடும்பத்துடன் வேப்பிலைபட்டிக்கு வந்து சேர்ந்தனர். கோயில் மண்டபத்தில் தங்கியிருந்த இவர்கள், அடுத்த நாள் அதிகாலை சுமார் நாறு மணியளவில் இயற்கை உபாதைக்காக வெளியேறினர்.
ஆனால், நீண்ட நேரம் கழித்தும் திரும்பாததால், அவர்களின் மனைவிகள் அப்பை நாயக்கன்பட்டி காவல் நிலையத்தில் புகார் அளித்தனர். ஐந்து நாட்கள் வரை தீவிரத் தேடுதல்களுக்குப் பிறகும் எந்தத் தடயமும் கிடைக்காததால், போலீஸ் 'மிஸ்ஸிங்' வழக்கு பதிவு செய்தது.
இதற்கிடையே, நேற்று (நவம்பர் 7) வேப்பிலைபட்டியில் உள்ள ஒரு பாழடைந்த உரைக்கிணத்திற்கு அருகில் விளையாடிய குழந்தைகள், அந்த கிணற்றில் இருந்து கொடுமையான துர்நாற்றம் வருவதை உணர்ந்திருகிரார்கள்.
வழக்கத்திற்கு மாறான மோசமான துர்நாற்றம் காரணமாக அந்த உரைக்கிணற்றை எட்டி பார்த்த போது கடும் அதிர்ச்சிக்கு உள்ளாகினர். அதில் இரண்டு ஆண் சடலங்கள் கிடக்கும் நிலையைப் பார்த்து அதிர்ச்சியடைந்தனர். உடனடியாக தங்கள் ஊர் மக்களிடம் தகவலை தெரிவித்தனர்.
அப்பகுதி மக்கள் அப்பை நாயக்கன்பட்டி போலீஸுக்கு தகவல் தெரிவித்தனர். தீயணைப்பு படையின் உதவியுடன் சம்பவ இடத்திற்கு விரைந்த போலீஸ், சடலங்களை மீட்டு அடையாளம் காண்பதற்காக விசாரணையைத் தொடங்கியது. காணாமல் போனோர் புகார் பதிவுகளை ஆய்வு செய்த போலீஸ், ரவிக்குமாரும் சுரேஷ்குமாரும் என்பதை உறுதிப்படுத்தியது.
உறவினர்களை அழைத்து வந்து சடலங்களைக் காட்டியபோது, அது உறுதியானது. அரசு மருத்துவமனையில் நடத்தப்பட்ட பிரேதப் பரிசோதனையில், இருவரும் மின்சாரத் தாக்கத்தால் உயிரிழந்ததாகத் தெரியவந்தது. இதன் அடிப்படையில், அருகிலுள்ள விவசாயத் தோட்ட உரிமையாளர்கள் மணிகண்டன் (40), சுதாகர் (38) ஆகியோரை விசாரணைக்காக அழைத்துச் சென்றது.
விசாரணையில், தோட்டத்தில் பயிர்களை காட்டு விலங்குகளிடமிருந்து பாதுகாக்க, இவர்கள் சட்டவிரோதமாக மின்வேலி அமைத்திருந்தது வெளிப்பட்டது. அதிகாலை இயற்கை உபாதைக்காக சென்ற ரவிக்குமாரும் சுரேஷ்குமாரும், அந்த வேலியில் சிக்கி சம்பவ இடத்தில் உயிரிழந்தனர்.
தங்களுக்கு தண்டனை ஏற்படும் என அச்சமடைந்த இவர்கள், சடலங்களை மறைக்க, அருகிலுள்ள பாழடைந்த உரைக்கிணத்தில் தூக்கி வீசி, எந்தத் தகவலும் தெரியாததுபோல அமைதியாக இருந்ததாகத் தெரிகிறது. இச்சம்பவம் குறித்து போலீஸ் தீவிர விசாரணை நடத்தி, இருவரையும் கைது செய்துள்ளது.
இச்சம்பவம் குறித்து அப்பை நாயக்கன்பட்டி போலீஸ் இன்ஸ்பெக்டர் ராமச்சந்திரன் கூறுகையில், "பிரேதப் பரிசோதனை அறிக்கை மற்றும் புலன் விசாரணையின் அடிப்படையில், சட்டவிரோத மின்வேலி காரணமாக உயிரிழப்பு ஏற்பட்டது உறுதி. குற்றவாளிகள் கைது செய்யப்பட்டுள்ளனர். மேலும் விசாரணை நடைபெறுகிறது," என்றார்.
இதுகுறித்து கிராம மக்கள் கடும் அதிர்ச்சியும் கோபமும் தெரிவித்துள்ளனர். ஒரு கிராமவாசி கூறுகையில், "விவசாயத் தோட்டங்களில் அனுமதியின்றி மின்வேலி அமைப்பது விலங்குகளுக்கு மட்டுமல்ல, மனித உயிர்களுக்கும் ஆபத்தானது. ஏற்கனவே பல சம்பவங்கள் நடந்துள்ளன.
அரசு கடுமையான நடவடிக்கை எடுத்து, சட்டவிரோத செயல்களுக்கு தண்டனை வழங்க வேண்டும்," என்றார். விருதுநகர் மாவட்ட காவல்துறை, சம்பத்திரம் சம்பவத்தைத் தொடர்ந்து, அருகிலுள்ள தோட்டங்களில் மின்வேலிகளை ஆய்வு செய்ய உத்தரவிட்டுள்ளது.
இச்சம்பவம், கிராமப்புறங்களில் பாதுகாப்பு நடவடிக்கைகளின் அவசியத்தை மீண்டும் நினைவூட்டுகிறது.
Summary : Two relatives, Ravi Kumar and Suresh Kumar, vanished during a wedding in Veppilai Patti, Virudhunagar, on October 31. A week later, their decomposed bodies were recovered from an abandoned well. Autopsy confirmed electrocution death from an illegal electric fence meant to protect crops from wildlife. Farm owners Mani Kandan and Sudhakar hid the bodies fearing legal action and were arrested after police investigation.
