மும்பை : கடந்த ஏப்ரல் 25ஆம் தேதி இரவு தெற்கு மும்பை பைதோனி மொகுல் குடியிருப்பில் நடைபெற்ற குடும்ப விருந்துக்குப் பின், ஒரே குடும்பத்தைச் சேர்ந்த நான்கு பேர் மர்மமான முறையில் உயிரிழந்த சம்பவம் பெரும் பரபரப்பை ஏற்படுத்தியுள்ளது.
பிரியாணி சாப்பிட்ட பின்னர் தர்பூசணி சாப்பிட்டதால் மரணம் ஏற்பட்டதா என்கிற சந்தேகம் எழுந்த நிலையில், தடயவியல் (போஸ்ட்மார்ட்டம்) அறிக்கை அதிர்ச்சியூட்டும் தகவல்களை வெளியிட்டுள்ளது.பலியானவர்கள் யார்?
இறந்தவர்கள்:
- அப்துல்லா டோகாடியா (40)
- அவரது மனைவி நசீம் (35)
- மகள் ஆயிஷா (16)
- மகள் ஜைனாப் (13)
அப்துல்லா அந்தேரி பகுதியில் மொபைல் உதிரி பாகங்கள் கடை நடத்தி வந்தார். ஏப்ரல் 25ஆம் தேதி சனிக்கிழமை இரவு அவரது சகோதரர், சகோதரி உள்ளிட்ட ஐந்து உறவினர்களை வீட்டுக்கு விருந்துக்கு அழைத்திருந்தனர்.
இரவு 10:30 மணியளவில் ஒன்பது பேரும் சிக்கன் பிரியாணி உணவு உண்டனர். விருந்தினர்கள் சென்ற பின்னர் நள்ளிரவில் அப்துல்லா, நசீம் மற்றும் இரு மகள்கள் மட்டும் தர்பூசணி சாப்பிட்டதாகக் கூறப்படுகிறது.
அடுத்த நாள் அதிர்ச்சி
ஞாயிற்றுக்கிழமை அதிகாலை 5:30 மணியளவில் நால்வருக்கும் வாந்தி, வயிற்றுப்போக்கு ஏற்பட்டது. உள்ளூர் மருத்துவர் டாக்டர் ஜியாத் குரேஷி முதலுதவி அளித்து ஜெய் ஜே நகர் மருத்துவமனைக்கு அனுப்பினார். முதலில் ஜைனாப் காலை 10:15 மணிக்கு உயிரிழந்தார். பின்னர் ஆயிஷா, நசீம் மற்றும் அப்துல்லா அடுத்தடுத்து உயிரிழந்தனர்.
விசாரணையில் திருப்பம்
விருந்தில் பங்கேற்ற ஐந்து உறவினர்களும் அதே பிரியாணியை சாப்பிட்டும் தங்களுக்கு எந்தப் பாதிப்பும் இல்லை என வாக்குமூலம் அளித்தனர். இதனால் உணவு விஷம் அல்ல என முடிவானது. பின்னர் தர்பூசணி சாப்பிட்டதே மரணத்துக்கு காரணமா என சந்தேகம் எழுந்தது.
ஆனால் தடயவியல் அறிக்கை வேறு கதையைச் சொல்கிறது:
- இறந்தவர்களின் மூளை, இதயம், குடல் ஆகிய உறுப்புகள் பச்சை நிறமாக மாறியிருந்தன.
- அப்துல்லா டோகாடியாவின் உடலில் மார்பின் (Morphine) தடயங்கள் கண்டுபிடிக்கப்பட்டன.
முன்னாள் பொது சுகாதாரத் துறை இயக்குநர் டாக்டர் குழந்தைசாமி உள்ளிட்ட நிபுணர்கள், இந்த அறிகுறிகள் வழக்கமான உணவு விஷத்துடன் பொருந்தவில்லை எனத் தெரிவித்துள்ளனர்.
மார்பின் போதை மருந்தாகவும், வலி நிவாரணியாகவும், சில சமயங்களில் விஷமாகவும் பயன்படுத்தப்படுவதாகக் கூறப்படுகிறது.
பல கோணங்களில் விசாரணை
மும்பை போலீசார் பல திசைகளில் விசாரணை நடத்தி வருகின்றனர்:
- கொலை சதி – குடும்பத்துக்கு எதிராக பகைவர்கள் இருந்திருக்கலாம். உணவு அல்லது தர்பூசணியில் விஷம் கலந்திருக்கலாம்.
- தற்கொலை – அப்துல்லா 2019ஆம் ஆண்டு டி.என். நகர் போலீஸ் நிலையத்தில் பதிவான மோசடி வழக்கில் முக்கிய சாட்சியாக இருந்தார். ரியல் எஸ்டேட் அதிபர் தொடர்பான இந்த வழக்கில் அவர் அழுத்தத்துக்கு உள்ளாகியிருக்கலாம். குடும்பத்தோடு தற்கொலை செய்துகொண்டிருக்கலாம்.
- தற்செயல் – தர்பூசணியில் பூச்சிக்கொல்லி மருந்து இருந்திருக்கலாம் என்கிற அச்சமும் உள்ளது. ஆனால் இது உடனடி மரணத்துக்கு வழிவகுக்காது என நிபுணர்கள் தெரிவிக்கின்றனர்.
தடயவியல் ஆய்வகத்திடம் இருந்து முழு அறிக்கை வரும் வரை, உணவு, தர்பூசணி அல்லது வேறு ஏதேனும் பொருட்களில் மயக்க மருந்து அல்லது விஷம் இருந்ததா என்பது உறுதியாகத் தெரியவில்லை.
போலீசார் குடும்ப உறவினர்கள், அண்டை வீட்டாரிடம் தொடர்ந்து விசாரணை நடத்தி வருகின்றனர்.
இந்த சம்பவம் மும்பை முழுவதும் பெரும் அதிர்ச்சியை ஏற்படுத்தியுள்ளது. மேலும் விவரங்கள் வெளியானவுடன் போலீஸ் தரப்பில் அதிகாரப்பூர்வ அறிக்கை வெளியாகும் என எதிர்பார்க்கப்படுகிறது.
Summary : Four members of a family in Mumbai passed away after a family gathering on April 25 where they consumed biryani and watermelon. Relatives who ate the biryani remained unaffected. Forensic examination showed green discoloration in organs and traces of morphine. Police are continuing their investigation and awaiting complete laboratory reports.
