கன்னியாகுமரி மாவட்டம், வெள்ளமடம் அருகே உள்ள திருப்பதிச்சாரம் பகுதியைச் சேர்ந்த திருமணமான பெண் ஒருவர், தனது குடும்பத்துடன் வசித்து வருகிறார். பெட்ரோல் பங்கில் பணியாற்றி வரும் இவர், மிகவும் ஏழ்மையான குடும்பத்தைச் சேர்ந்தவர். கடந்த சில மாதங்களுக்கு முன்பு, வக்பு வாரியத்திற்கு உட்பட்ட ஒரு இடத்தை குத்தகைக்கு எடுத்து, அதில் சிறிய வீடு கட்டியுள்ளார்.
வீட்டிற்கு மின்சார இணைப்பு பெறுவதற்காக, அந்தப் பகுதிக்கு உட்பட்ட மின்சார வாரிய அலுவலகத்திற்கு நேரில் சென்று கோரிக்கை மனு அளித்தார். மனுவைப் பெற்றுக் கொண்ட அதிகாரி, பீமநகரி பகுதியைச் சேர்ந்த தாணு மூர்த்தி என்பவர், பெண்ணிடம் சில விசாரணைகளை மேற்கொண்டார்.
அப்போது, “குறிப்பிட்ட சமுதாயத்திற்கு சொந்தமான இடத்தில் வீடு கட்டியுள்ளதால் மின் இணைப்பு கொடுப்பதில் சில சிக்கல்கள் உள்ளன” என்று கூறி, மனுவைப் பரிசீலனை செய்து தகவல் தெரிவிப்பதாகக் கூறி அனுப்பி வைத்தார்.
நீண்ட நாட்கள் கழிந்தும் எந்தத் தகவலும் வராத நிலையில், பெண் மீண்டும் அலுவலகத்திற்குச் சென்றார். அப்போது அதிகாரி ஏதேதோ காரணங்களைக் கூறி அலைக்கழித்துவிட்டு, “உங்கள் செல்போன் எண்ணைத் தாருங்கள், மனு பற்றி தகவல் தெரிவிக்கிறேன்” என்று கூறினார். அதை நம்பிய பெண் தனது எண்ணைத் தந்தார்.
அதன் பிறகு, அதிகாரி தாணு மூர்த்தி தொடர்ந்து செல்போனில் தொடர்பு கொண்டு பேசத் தொடங்கினார். “மின் இணைப்பு கொடுப்பதில் சிக்கல்கள் இருக்கின்றன, ஆனால் நான் தனிப்பட்ட முறையில் கவனித்துக்கொள்கிறேன். உங்களுக்காக சிறப்பு நடவடிக்கை எடுக்கிறேன்” என்று கூறி வந்தார்.
பின்னர் பேச்சு திரும்பி, பாலியல் சீண்டலாக மாறியது. “மின் இணைப்பு கொடுக்கிறேன், ஆனால் அதற்கு கைமாறாக நீ என்னுடன் தனிமையில் இருக்க வேண்டும். அதிகாரிகள் பிரஷர் கொடுப்பதால் இப்படிக் கேட்கிறேன். நாம் ஜாலியாக இருக்கும் இடத்தை நீ சொல்லு” என்று பாலியல் ரீதியான தொல்லையில் ஈடுபட்டுள்ளார்.
இதனால் ஆத்திரமடைந்த பெண், இந்தச் சம்பவம் குறித்து மாவட்ட ஆட்சியரிடமும், மின்சார வாரிய உயர் அதிகாரிகளிடமும் புகார் அளித்தார். புகாரை அறிந்ததும், குறித்த மின்வாரிய அதிகாரி தாணு மூர்த்தி தலைமறைவாகி விட்டதாகத் தகவல்கள் தெரிவிக்கின்றன.
இந்தச் சம்பவம் கன்னியாகுமரி மாவட்டத்தில் பெரும் அதிர்ச்சியை ஏற்படுத்தியுள்ளது. பெண்களுக்கு எதிரான பாலியல் தொல்லை மற்றும் அதிகார துஷ்பிரயோகம் குறித்து கடும் கண்டனங்கள் எழுந்துள்ளன. மேலும் விசாரணை நடைபெற்று வருவதாகவும், அதிகாரி கைது செய்யப்படுவார் என்றும் எதிர்பார்க்கப்படுகிறது.
Summary : A woman from Thirupathisaram near Vellamadam, Kanyakumari district, applied for electricity connection for her rented house. The electricity board official repeatedly called her, demanded personal favours in exchange for approving the connection, and later went into hiding after she lodged a complaint with higher authorities.
